Sesungguhnya agama (yang benar dan diredai) di sisi Allah ialah islam dan orang-orang (Yahudi dan Nasrani) yang diberikan Kitab itu tidak berselisih (mengenai agama islam dan enggan menerimanya) melainkan setelah sampai kepada mereka pengetahuan yang sah tentang kebenarannya; (perselisihan itu pula) semata-mata kerana hasad dengki yang ada dalam kalangan mereka dan (ingatlah), sesiapa yang kufur ingkar akan ayat-ayat keterangan Allah, maka sesungguhnya Allah Amat segera hitungan hisabNya. [Surah Ali Imraan: Ayat19]

Rakan Iban Muslim

3 Jun 2009

Ripih kenang lemambang sabak nganjung semengat

Ulih Anya Kedap [The Borneo Post]

Ngeratan pejalai semengat ari pun kitai mensia mati sereta semua menua pansa iya nyentuk datai di Sebayan

Jarang bansa bukai ke enda muji raban bansa kitai Iban laban ngembuan pengelandik ngena sereta ngaga leka jaku ke setimbal dalam main kena betundi tauka dikena dalam pengawa begawai enggau pengawa rama sereta pengerami baka melah pinang tauka pengerami bukai ba rumah panjai.

Orang ti selalu didinga kitai muji pemanah enggau pengaya jaku kitai nya nadai lebih agi ari bala ribai ke bisi ngadu pansik dalam main enggau adat asal bansa Iban ari kelia ngagai diatu. Enti kitai kala macha sekeda bup dalam jaku Inglis ke ditulis bala sida Prof Derek Freeman, Prof Clifford Sather, Malcolm MacDonald, Ling-Roth enggau sekeda scholar ke bukai, kitai tetap temegah ati ninga puji sida pasal jaku enggau pengaya main sereta adat asal kitai Iban.

Tudah pangan bepeluang begulai enggau Sather bisi empat taun ba Universiti Sains Malaysia kelia, lalu mega bisi betemu sereta bekelala enggau Freeman di Pulau Pinang mega dalam taun 1975. Seduai tu ukai mina rindu pasal jaku Iban tang sama nemu berandau ngena jaku Iban.

Freeman madah bala kitai Iban tu ‘master of language’. Ku Freeman: ” Kita Iban pandai ngena jaku, ba jalai jaku, ngaga jaku, ngemanahka jaku, landik milih sereta ngeripih leka jaku sereta mega ngembuan mayuh bengkah main ke ngena tusun jaku setimbal munyi, baka ke dikena dalam poems enggau prose dalam jaku Inglis. Chukup landik bansa kita.”

Kitai ngembuan mayuh main asal benyawa ke ngena tusun jaku ke setimbal sama semunyi dalam mayuh bengkah pengap, renung, timang jalung, timang kenyalang sereta timang bukai, sugi, sanggai, pantun, dungai, jawang, ramban, sabak enggau sekeda main asal bukai. Main asal bukai ke enda ngena nyawa nya baka sampi, biau, ansah, entelah enggau utai bukai.

Tang ari semua main asal benyawa nya dua iti pengawa nya ke ngangkunka ati ari reti enggu tuju iya nadai lebih ari timang jalung enggau sabak.

Nyadi sabak tu dikena ngintu pemati, tauka lebuh nyenggai orang ke parai, lalu timang jalung nya kena orang ngintu Gawai Antu. Nya alai bansa Iban ngembuan adat asal ke nyelai, laban dalam pengarap lama, enti orang nya mati iya lalu disabak ke alai lemambang sabak ngeluluka semengat orang mati ninggalka tubuh iya lalu belabuh bejalai nengah mayuh bengkah menua burung, jelu, antu enggau utai bukai nyentukka iya datai ba menua Sebayan din.

Tang siti adat asal enggau pengarap lama ti ngasuh bansa kitai jauh nyelai ari bansa bukai nya pengawa kitai ke ngembuan adat enggau main asal kena ngangau pulai ka menua (rumah panjai asal) semengat orang ke udah mati nya ati Sebayan. Jalai kangau tu ngena main asal ke kumbai kitai timang jalung, lalu dikereja sereta ambika batang pengawa lebuh ngintu Gawai Antu.

Nyadi lebuh Gawai Antu lemambang ngeluluka semengat bala orang ke udah mati nya angkat ari menua Sebayan, iya nya Batang Mandai, ngena timang penama timang jalung. Jalai semengat bala Sebayan nya pulai ka menua lama sida nya sama beripih ka pun baru baka ripih tengah semengat sida baru mati mansang ngagai Batang Mandai dulu suba.

Nya alai reti nya, leka sabak enggau timang jalung tu ngeripih dua iti jalai semengat kitai mensia mansang ngagai enggau pulai nemuai ari menua Sebayan.

Lebuh siku mensia nya parai, iya lalu disenggai. Ditu meh lemambang tauka tukang sabak nya ngeluluka diri nganjung semengat orang ke udah parai ngagai menua Sebayan di Batang Mandai.
Iya terubah ngeluluka diri deka ngemai orang ke dikangau iya nya tadi sama enggau nganjung semengat orang ti parai disabakka iya nya.

Udah nya iya ngelulu nanya orang ke parai meda iya tak nyelai gamal. Mayuh ga genteran sabak iya ditu ke kadang bisi ga ngasuh sinu ati.

Udah bekau nya lemambang sabak lalu ngerara kebung langit, lalu serabana tusah ditinggal orang ke parai.

Tembu kenang nya, lemambang lalu ngerara kesulai, iya nya tanda bala ari Sebayan datai. Ditu lemambang lalu madah ka orang ke parai nya bala Sebayan ke bisi datai sereta lalu ngeluluka sida nya udah manggai ba pendai orang ke mati munyi tu: Nyau manggai meh bala raja sida Niram, Raja Sebayan di pendai renjan, Orang ke datai ari Limban dalam begenenang.

Udah nya, ku lemambang sabak nya, bala Sebayan laku niki ka rumah lalu dibiau enggau manuk. Iya ngeluluka orang ke mati nya enggai enggau Sebayan laban sinu ninggal bala iya ba menua, tang nyau kelama baru deka enggau. Lemambang sabak lalu ngelulu ka orang mati nya minta baiya enggau chukup.

Sebayan pan lalu mupuk nurun mai orang ke mati nya pulai ka Mandai. Betuaika Raja Niram tuai Sebayan, sida lalu niti jalai pendai, udah nya lalu mansa tembawai lama. Lepas nya sida lalu mansa temuda agi jerami, lalu mansa menua Bunsu Ketupung Buban, menua Burung beragai, udah nya menua Bekubu Banda Bulu Burung Ketupung, menua Bunsu Kedampi, enggau menua Bunsu Buau. Datai ditu baru iya ke mati nya nemu diri parai.

Ku iya, lesi meh aku tu bebadi laya tetumpat, pia ku jaku aki bujang sigat. Nama aku tu nyau melakang ka gentilang remang rarat, nyau berindik di madang rumput gamat,baka kempat guntin bujang.

Lemambang lalu ngelulu ka sida mansa langkau alai orang beburung. Udah nya lalu mansa menua Indu Antu, udah nya mansa menua anak mati lulus.

Sida lalu mansa jalai Anda Mara enggau jalai Simpulang Gana.

Udah nya bala sida lalu mansa jalai Manang Nyara Ke belian ka bedega nyarang takang. Sebayan pan lalu datai ba jalai rurus ka menua Batang Mandai Mati. Lepas ari tu sida lalu mansa menua Bunsu Dundun Berani Ke tau betenun ninting hari ninting pagi,orang betenun enda berenti semadi putus tali lumbai pemuntang.

Limpas ari nya sida lalu mansa menua Bunsu Semalau Mukau, udah nya menua Bunsu Burung Tiup Api. Sida pan lalu mansa menua Bunsu Bubut. Lemambang sabak nyebut iya munyi tu: Nya ga Bunsu Bubut Dara ke ngemata ka nanga jalai midang.

Nyadi ba pengarap lama kitai Iban enti selalu ninga bubut memunyi, nya munyi ke sinu laban bubut nya nyabak ngetanka semengat orang ke parai. Nya alai ku kelulu lemambang sabak: Oh anang meh nuan enggau orang midang laya sulai deh aki bujang besai, pia ku jaku Bunsu Bubut Tuai. Aku deka merindang nuan enggau pelulin tinchin mas urai….nyangka ukur semengat nuan agi ulih tangkap Rechap manang tuai.

Bala Sebayan pan lalu datai ba Titi Rawan ke dipangkang endu dara tuyu, ke bejaku tau bejeratan, dipangkang Kumang tukang nyabak nyedan, nya ga Bunsu Bubut Buban orang ke ngibun Titi Rawan.

Angkat ari nya sida lalu mansa menua Burung Raya, iya nya burung ke nganjung asi pana ari menua tu ka Sebayan. Udah nya mansa menua Raja Sera Ganti, menua Raja Selampandai, menua Burung Kuang Kebat, menua Bunsu Remaung, menua Raja Siba Iba, iya nya Bunsu antu ke tau meda menua tu enggau menua Sebayan. Angkat ari nya mayuh mega bengkah menua antu, menua burung enggau jelu, sereta utai bukai ke kena pansa sida apin sida datai ba Pengkalan Ai Mandai ke alai sida mandi.

Udah bala Sebayan mandi, lemambang sabak lalu ngeluluka sida mupuk bedarat ari pengkalan nya tadi ngagai rumah sida. Lebuh ke bedarat nya bala sida mega mansa sekeda menua antu, menua petara nyengkaum menua Indai Bilai Tusu Lanjut Panjai Lempai ka belakang. Ka pengabis iya bala sida lalu datai di rumah, ba bilik penaik di Sebayan.

Nyadi lebuh orang niri Gawai Antu, semengat orang ke udah parai nya dikeluluka lemambang ke nimang jalung pulai angkat ari Sebayan ngabas menua lama, iya nya nikal ngagai rumah panjai alai iya parai dulu menya laban bala peturun iya begawai merantu iya.

Menua dipansa semengat orang nya angkat ari Batang Mandai pulai ngagai menua lama iya, nitihka kelulu lemambang timang jalung nya sebaka enggau menua ke dipansa iya mansang dulu lebuh baru parai.

Leka ke bebatang dalam timang jalung nya bala ari Sebayan begau, udah nya lalu bebai nurun ngabang.

Lebuh udah nurun ngabang, sida lalu datai ba menua Indai Bilai, Manang Nyara, Indu Mati beranak, Orang Mati Pandak Umur, Orang Mati Makai Tubai, Orang Mati Labuh, Mati Tesat, Mati Lemas, Mati Pangka Peti, Mati Telih enggau mayuh bengkah pemati.

Angkat ari nya, sida mansa mayuh bengkah menua bunsu burung, bunsu antu, bunsu jelu nyengkaum menua Bunsu Belut ke beberita muka Pintu Tanah. Nyadi lebuh Sebayan ke nuntung ba Pintu Tanah, dia lemambang lalu ngeluluka Dara Rambai Geruda meransang orang ke lelaki muka Pintu Tanah.

Tang siku pan nadai meh berani muka. Nya alai dia baru Bunsu Belut muka Pintu Tanah munyi ke udah disebut tadi. Udah nya baru bala Sebayan ngalih ba menua kitai idup tu baka menua Mengalai Ulun Tuai Indai Bilai, menua Burung Belangking enggau menua Bubut. Bala Sebayan lalu mansa temuda ke alai sida bayam bunga tanam dia.

Angkat ari nya sida lalu datai ba tembawai, sereta pendai orang ke begawai. Ditu orang ke ninga kelulu lemambang tau labuh ai mata laban semengat orang ke udah parai nya ingat ka ulah iya agi idup, lebih agi rambau iya agi biak menya, bentancharka batu kinyang ba pendai, betundi enggau sida ke indu, bebuti sama bujang enggau dara. Nya alai utai tu tau ngasuh kitai sinu ati ninga, lebuh orang parai nya mulaika pengingat iya.

Udah nya baru bala Sebayan nuntung ba madang ranyai. Ditu bala indu Sebayan lalu ngila ka pemanah madang ranyai. Sida ke berani lalu ngupas daan ranyai, lalu dientudika pengawa alai bala orang ke berani nyelai ranyai. Lepas nya baru bala Sebayan niki rumah orang ke begawai.

Lemambang nimang jalung semalam-malam ngagai maya ai jalung dituntung ka irup orang ke ngirup jalung. Udah nya baru sida ngelulu Sebayan pulai baru ngagai menua Batang Mandai: Lalu ketawa nerekan meh Ini Inan, Gaga pulai nandai ngabang, Ari gelenggang Batang Kedap kanan, Gaga nyaan rugan papan, Bedaan ka tandan tebu tengang, Tak lalu sentai langgai meh Indai Bilai, gaga pulai ngabang, ari Batang Kedap nyulai, Naban ka salai kerungan batang….

Lemambang pan lalu nyebut leka timang kena sida mulaika semengat sida empu.

Nya alai dia kitai udah meda pengelandik bansa kitai ke bemain enggau tusun jaku ngenang menua tengah semengat orang ke baru parai nyentuk ka penatai iya di Batang Mandai, menua Sebayan sereta mega pemulai iya baru lebuh orang niri Gawai Antu kena merantu iya.
IBAN MUSLIM:
Tulisan di atas adalah satu bentuk kepercayaan turun temurun masyarakat Iban yang masih lagi diamalkan segolongan kecil masyarakat Iban pada hari ini. Sebelum Tahun 90-an dahulu, amalan nenek moyang sebegini sememangnya menjadi satu asas kepercayaan yang dipegang oleh masyarakat Iban. Lazimnya, upacara kematian akan dikendalikan dengan pelbagai adat budaya turun temurun. Pada hari ini, semakin berkurangan orang-orang yang berkemahiran dalam melaksanakan upacara ini. Nenek saya salah seorang yang mahir dalam mengendalikan upacara ini satu ketika dahulu. Namun, sekarang beliau terpaksa berehat kerana masalah kesihatan yang tidak mengizinkannya meneruskan tugasnya itu.
Terlalu panjang tulisan tersebut untuk saya 'translate'kan satu persatu. Bagi orang Iban, insyaAllah dia memahami tulisan itu. Sebagai catatan, sejak segolongan besar orang Iban beralih kepada kepercayaan Kristian yang dibawakan oleh pendakyah-pendakyahnya, amalan atau upacara ini tidak lagi dilakukan. Golongan milineum hari ini ramai yang tidak pernah melihat bagaimana upacara ini dikendalikan. Saya sempat melihat bagaimana upacara ini dilakukan.

0 Pandangan: